【導致腎虛嘅行為】

上一篇文提到腎虛係男人同女人都有機會面對嘅問題，今次就講下有咩原因導致腎虧，等大家可以預防勝於治療，避免變虧。

生活習慣上，成日搬重嘢、姿勢差，令自己腰酸骨痛，腰部冇好好休養，會有機會導致腎虧，因為中醫認為，腎同腰息息相關，如果腰受傷、痠痛，腎就會唔好。另外，喜歡坐地下嘅朋友都要注意啦，因為地下會床有濕氣，成日坐地下會令濕氣走到我哋嘅下盤同腎，導致腰痛、水腫，都會傷腎。

飲食方面，經常食煙飲酒會傷到我哋嘅元氣，導致腎虛，而成日飲太多凍飲凍野或食太多寒涼嘢（特別係瓜果類），當中嘅寒氣會傷到腎嘅陽氣，導致我哋容易尿頻，腰痛等。

最後，最被人忽略嘅腎虧原因，係我哋嘅情緒問題。成日聽到有人驚到瀨尿、嚇到瀨屎，其實係好有根據，因為過分嘅恐懼、驚嚇、憂心😮‍💨、緊張等負能量都係會傷害腎精，嚴重的話唔單止會導致漏尿遺精，仲有可能會腰酸腳軟，所以精神狀況要好好注意，細膽嘅話，就唔好亂睇鬼片嚇自己啦。